Ceir golygfa eithaf da o lethr gwelltog sy’n edrych dros y môr ger Aberffraw. I’r chwith, gwelir mynyddoedd Eryri yn codi ac, i’r dde ohonoch, y mae’r traeth tywodlyd yn ymestyn yn Rhosneigr.
Ac islaw i chi y mae’r Corcsgriw (‘The Corkscrew’). Rhwystr gosod, serth, i lawr allt, y mae llond trac o geir rasio yn llifo trwyddo gyda’u hinjans yn sgrechian.
Dyma Trac Môn, un o’r traciau rasio a chanddo’r lleoliad mwyaf ysblennydd yn y byd. Dim ond Phillip Island, cartref MotoGP bike GP Awstralia, sy’n dod yn agos.
Fe gafodd yr hyn a oedd unwaith yn wersyll hyfforddi radar a thaflegrau i’r fyddin, ei ailddatblygu am gost o £3.6 miliwn yn 2007. Ceir yno bellach bedwar cyfluniad trac gwahanol sy’n cyfuno cambrau llawn dychymyg, rhannau cyflym, bachdroeon a chornel ar oleddf o 10%, sydd bron yn unigryw.
Does dim syndod fod Richard Hammond o ‘Top Gear’ yn meddwl ei fod yn lle da am dipyn o hwyl gyda Bowler Nemesis a thri hofrennydd.
Yn 12 metr o led, Trac Môn yw’r trac rasio lletaf ym Mhrydain, ar wahân i Silverstone. Sy’n caniatáu digon o oddiweddyd cyffrous yn ei rasys ceir a beics. Yn ogystal, cynhelir yno sbrintiau ceir, ralïau fesul cam a diwrnodau trac nad ydynt yn rhai cystadleuol.
Ac mae’n gartref i’r Ganolfan Yrru Ceir Perfformiad a redir gan y cyn-yrrwr ceir rasio Richard Peacock. Sy’n digwydd bod y dyn a gynlluniodd y trac newydd o’r dechrau, gan gychwyn gydag ychydig o sgribliadau ar ddalen o bapur A3.
Mae’n hyfforddi pawb, o ddarpar yrwyr rasio i’r rheiny sydd ddim ond ag awydd mynd mewn car un-sedd pwrpasol ar gyfer trac, neu uwch-gar fel Lamborghini Gallardo.